Í nótt fengum við endanlega staðfestingu á því að Ugla er vita gagnslaus þegar kemur að vörnum gegn innbrotum.

Ég heyrði þrusk um kl 4 í nótt og kíkti fram. Ég sá ekkert í myrkrinu í fljótu bragði, en fannst undarlegt hvað Ugla horfði illum augum á eitthvað undir eldhúsborðinu.

Ojú, þar glitti í tvær óboðnar glyrnur og fór ófétið strax að maula á matnum hennar Uglu fyrst ég var búinn að góma hann hvort eð er.

Ég fylgdi innbrotsþjófinum til dyra (ehh, til glugga) með lágstemmdum óbótaskömmum og skammaði Uglu fyrir gunguskapinn. Það er algjört lágmark að hvæsa á óboðna gesti eða hlaupa vælandi í burtu.